Pasian geelna le makaihna tawh Zomite leitung gam tuamtuam ah kithehthang in i omna sungah Norway gam zongah Zomi mimal gawm vekpi 180-200 kim om hi. Tua banga gam tuamtum ah i omna sungah Zomi min pua in, Khristian kipawlna Zomi Christian Fellowship (ZCF) ci in, a tamzaw a gammin zui in kiphuankhia ciat hi. Tua mah bangin Zomi min pua in nopna & dahna lam le minam vai khat peuh septheihna ding ngimna tawh Zomi Innkuan cih kinei leuleu in, leitung huam dongah Leitung Zomi Innkuan (LZI) cih nangawn kinei hi.Tua bek tham loin, abeisa 2010 kum Cope Centennial Jubilee, Tedim panin Global Zomi Alliance (GZA) cih i nei leuleu a, tulaitak Kawlgam-vaigam le leitungbup ah Zomite kipawlna aa lianpen le a zaipen dingin kilamen hi.
Tuate' sungah Europe gampi sung a om Norway gam zongah abeisa kum 8/9 hun lai akipan Zomi Innkuan Norway (ZIN) ci-in kipawlna kiphuankhia a, tuni dong maban kizomtoto thei hi. Hih Zomi Innkuan Norway (ZIN) in abeisa ciangciang Zomi le Zogam ading akitheitham sepkhiatna cihte akineih zawhloh hangin, mai lamah na lianpi sepzawhna ding ngimna thak kinei hi. Tua bang ngimnate tangzai le a picin zawkna ding ngimna tawh Norway kumpi' theihpihna/ phalna kingen a, April 3,2014 ni in, Norway kumpi' tung pan theihpihna / phalna Organization number kingah ta cih thu Tg. Langh Sian Tuang @ Tuangpi, Secretary of ZIN tung pan kizasawn hi.
Tua hi in tulaitak Kawlgam ah gambup mimal kisimna (Myanmar Census 2014) kinei laitak a, Kawlgam sungah Zomite minam kician khatin hong kiciamtehna ding lunggulhna tawh (Zomi-914) kigelh ciatna ding ZCD,GZA, ZYA le Zomi Census Committee(ZCC) cihte makaih in nasiatak hanciamna kinei hi. A sawt loin Census tungtawn in Zomite kumpite' hong theihpih minam kician khat i suak taktak ding cih lametna i neih kawmkal ah Zomi Innkuan Norway (ZIN) tungtawn in zong Norway kumpi in Zomite minam kiciankhat in hong thei le hong ciamteh taktak ta hi. Tua hi a, mai lamah Zomi min tawh Norway gam sungah Zomi Nam Ni (Zomi National Day) cihte i sanggam Chin kicite tawh kipawl nawnlo in, Zomi min ngiat tawh a tuam vilvel in kibawlthei/ zo ta ding cih zong lametna i neihpih hi.
Hih bangin Zomi Innkuan Norway (ZIN) in Norway kumpi' ciamtehna hangin, Zogam le Zomite' khantohna ding le leitung in minam kician khat a hong theih kipatna hi dingn i lamen hi. Tua bek tham loin, mai lamah hih ZIN in minam ading nalian tampi septheihna dingin, kumpi le kumpi ahilo NGO tuamtuam tawh kizopna nei a, i gam i lei a puah a zuun zo asuahna ding thungetna tawh mapanpih ciat ni. Zomi Innkuan Norway (ZIN) in Norway gamah kipawlna kician khat hong suak ahih manin, Zomite' ading Tangthu thak le Laimal thak khat mah suak hi. Hih banga Norway kumpi' ciamtehna/ theihphna angah Zomi Innkuan Norway (ZIN) hangin Tongsan International Media Group pan pahtawina le lungdampihna i pulak hi. Makai vaihawmte le Zomi Innkuan Norway mimal khempeuh Topa Pasian in ki-itna le kithutuahna thupha tawh makaih suaksuak hen cih zong i thungetna hisak ciat hi hang.
Ref: Tg. Langh Sian Tuang (ZIN Secretary)
No comments:
Post a Comment