The Third World Zomi Convention

Leitungbup Zomi Convention a 3 veina nei thei ih hih manin Pasian hehpihna phat hang. Ei Zomite tanglai ih pute khan lai in ei leh ei a kiuk minamte hi hang. India le Kawlgam in British kumpite khut nuai pan independence ih ngah a kipan Zogam pen gamkhat ah ki om non lo-in India leh Kawlgam in ong lang hawm uh hi.
 
India a om Zomite in democracy gam paizia nuai ah full state kiukna tawh ih om hangin Kawlgam a om Zomite in ngah nai lo hi hang. Kawlgam a om minam tuamtuamte in federal system ki ukna deih in 1962 kum in a 2 veina Panlong Conference ki thukimna tawh parliament ah gen ding a ki vaihawm lai tak, 1962 kum March kha ni 2 ni in Prime Minister U Nu in Yangon khuapi a om Myanmar Radio Station auditorium ah minam tuamtuamte tangmite meeting sam in thugenna ki nei hi. Tua meeting a kah Zomi sagihte lak ah kei zong siamsin makai khat ka hih man in kihel ing. Tua ni zan in Kawlgam galkap mangpipa General Ne Win in Kawlgam kumpi thuneihna khempeuh la a hih manin Panlong Conference thukimna bangmah mapai lo hi.
 
Tu hun ciangin leitung gam nuam gam hoih teng ah tuipi gal kai in Zomi tampi tak lal khin hi hang. Ih tunna peuhpeuh ah ih Zo ngeina hoihte kem cingin ih biak Pasian mang ngilh kei ni. Pasian hehpihna tawh tu ciangciang ih khantoh zia ih et ciangin lawphuai mahmah a ih mailam lametna lian mahmah hi cih phawk tawntung ni.
 
Koikoi ah ih om zongin Leitungbup Zomi Convention in Zomite lungsim ong ki pumkhat sak tawntung ta hen.
 
Dr. H. Chin Khen Mang
Tulsa, Oklahoma USA. October 23, 2013

Dear Zomi U leh Nau:

Lamet loh laitak in Zomite' muan leh suan makaipi khat ahi Dr. Chin Do Kham (Tulsa, OK) in a zinpakna atunna Washington D.C. hotel sungpan in hong nusia cih dahna thu kiza hi.

Hong sihna thu acingzaw in a kitheih teh hong ki update toto ding hi.

Dahna lianpi lianpi tawh,

Executive Committee Zomi Innkuan USA, Inc.

Laikhah hun: October 13, 2013