Original Zomi

Pasian in Zomi te thupha hong pia a, tun ih hihna taktak ZOMI tawh hong kiciamteh ding bek hilo in ZOMI cihpen a kipsuak ding dinmun hong tung hita hi. Kawl kumpi in ZOMI cih minam om kei cia niin seel bangin seel mang hong sawm ngei khin uh hi. Himah taleh Pasian in ama bawlsa minam leh a kipsaksa minam pen a mangthan ding thukim het lo ahihmanin CENSUS hun manpha hong pia a hihi. Hibang hunhoih ih muhkik ding lamet tam nawn lo cih ei Zomi sunga makai thu ngaihsun theite'n na mukhol uh ahihmanin ZOMI in Code nei kei mah taleh Zomi khempeuh in Code Number 914 siksan in ZOMI gelh ciat ding hihang ciin hong tangko uh hi. 914 tawh ih lawhcin aleh Kumpi in ei ZOMI te Code kip hong pia ding hi. A thumang minam Zomi ih hihman in kimang pah diamdiam hi.

Kamphen kullo leh Ngeina kibang anei Zomi teng pumkhat ih suah ding Kumpite’n hong phallo uh hiding hiam CODE tuamtuam hong pia uh hi. ZOMI aa ding Code hong pia lo uh ahihman in hong piak uh ei CODE tekah gelh lehang ih Awsuah leh ih Khuamin teng ih minam min hong suak dinga, CHIN sungah Zomi teng alut gai ding ih hi hi. Pupa khanga ih minam min ZOMI pen a mangthang ding ong himawk hi. Mite’n ih nunglam pan a hong sapziauna leh hong neu-etna kammal ahi CHIN pen minam in a nei dingte kisuak tazen hi. Khasiat huai mahmah hi! Tua ahihmanin Zomi sungah a tamzaw in CHIN sung lutna Code teng nusia in CODE:914 ah ZOMI a gelh ih hihi. Zomi sungah apil asiam leh kumpi sunga panmun nei tampi takin amau mailam ding khualna tawh ZOMI hihna nungheisan in CHIN sung lutna CODE neuneute ah gelh uh hi. Hih thu hangin Zomi sungah meltheih tanau kikhenkham tam dingin zong ka um hi. Himah hi, groupmail sunga thugelhpa in “Ih vengnu ih vengpa Zomi ih sak leh CHIN na himawk veh e” a cih pen a takpi ahihi. Zomi dinga ih upmawh mipil misiam, ZOMI ka hihi aci ngangngang thugensiam tampi takte ZOMI na hihet lo uh cihna hi. Bang hangin amaute’n ZOMI hihna nusia in CHIN ah lut mawk uh hiding hiam? Iplah ding leh a ngillah huai CHIN sungah bang om mawk hiam?
 
“Tui helloh Zomi” ka cihte pen Zomi sungah tulaitak a 914 ah ZOMI a gelh ngamte ahihi. Hih 914 ih zatna hangin siatna om ding maw, phatna om ding maw kigen khol thei lo himah taseleh “ka minam Zomi hi, ZOMI ka hihna taisan thei lo ka hihman in sih akul leh zong ka sihpih dinga, sup leh baaina ka thuak lawhna ding ahileh zong ka thuak mai ding hi. Bang hang hiam cileh kei pen ZOMI ka hihi” acite bekin tutung in 914 ah ZOMI gelh uh hi. Hamphatna sum leh paai en masa lo in thumaan thutak mah lau lo takin na dinpih ngam uh cihna hi. Amaute hi “tui helloh ZOMI”, phuluum phulna ding leikha’n petlet cihmah bangin tangtawng peka ih minam min ZOMI a kipsuak theihna dingin hih tui helloh Zomi tengin ma hong pan uh ahihi. Amaute lamsa ZOMI Innpi sungah nikhat ni ciangin ZOMI khempeuh om khawm kik ding hang a, tuani ciangin kikhen om nawn lo ding hi. "Tui helloh Zomi" te Pahtawi huai uh hi. Topa’n thupha pia hamtang ding hi.
 
Zomi aw lau ken, thumaan thutak lamah Pasian om den hi.
 
Itna leh deihsakna tawh,
 
ZO Sunni pan

Francis Lamthang (Zomi Quavadis)