THANGHO LEH LIANDO TANGTHU

Thangho leh Liandote unau neucik ahih lai-un apa un sihsanin tagah suak uh hi. Apa uh omlohzawh unaute neucik hi mah leh, a nu uh pen a mailam ding a ngaihtut ciangin a lungkhamin, a lungleng kawng hi ding hiam, a theihloh kal un pasal neih sim dingin a kithawithawi hi.

Ni khat a tate' mit-ah vaiphulin kuangpi khat tawh khupin a tate a taisan hi. A nu a taimang lam a Ni in a theih ciangin a inn-ah va pai aleh, Thangho leh Liando a na kapkap uh hi. A kahna mun a zonzon hangin a Ni in a mu zo kei hi. "Thangho Liando koi-ah om nei vua?" ci-in zong kawkawi a, inn nuai-ah tuakleh inn tung tawh kibangin, inn tungah kah leh inn nuai tawh kibangin a zonzon hangin mu a zo kei hi.

A tawpna ciangin a Ni in, "Thangho leh Liando ka phawkna dingin hih kuangkum beek la dih ninge," ci-in kuangpi khat a hon leh, tua kuangkum nuai-ah vutkhu vaikhu-in a na om uh mu hi. Tua ciangin a Ni in a mit uh a nawizu pekin hoih takin a silsak hi. Tua ciangin a uital uh tawh a nu uh delh vingveng uh hi.

Lampi-ah Thangho in "Nu aw nong na ngak in!" ci-in a sap leh, "Na uital leh na nau lamsak/lamkhangah hong sawnpai inla, hong delh in." a nu in cih san zaw lai hi. Unaute'n a uital uh tawh delhdelhin; lampi-ah gim-le-tawlin dangtak gawp uh hi. Liando tuidim dingin kuan a; himahleh a tuithawl dim theilo hi. Anu'n a umtaw uh ana vuhvang saksa ahi hi.

Anu un na ngak dinga a sap zel uh hangin hong delh mengmeng un, cih leh taitai thuah hi. Thangho in anau tuitawi a om ngak den hi. Atawpna ciangin ni hong tumin, khua hong zing hi. Inn lam lah a kibansam hong suakta uh hi. Tua bangin agangte' mimphualpawl lak-ah hong giak uh hi.

Agal vuah anu uh galte'n tuakin amat sawm uleh "Kei hong man kei unla, gal-a unaute va man un" ci-in kihemkhia hi. Galte'n unaute giahna pawllak teipi tawh a hong ban dawt uhleh Liando' kheme dawt kha-a, aman na salua-in a u' kiangah "U aw na lua, ka kap dia?" a cih leh a u in, "Bawi, kap ke'nla, cikcik ci in; tua hi leh zusa hong sa ding uh hi," a ci hi. Tua bangin hong cihtak ciangin, galte'n zusa om hi, ci-in pawllak hong hal uh-a, a meikhu zui-in unaute taikhia-in a suakta thei bilbel uh hi.

A taina lam vuah Vompi kuahawm khat tuak kha uh-a, tua sungah hong bu uh hi. Vompi hong lut ciangin a mul in Liando nak sung sunkha hi ding hi ve'n, anak zia sa-in a hehchiai leh, vompi kilatin thakhatin lengkhia-a, a khang ken-ah kia-in a si hi.

Zing khuavakin unaute'n akhang vua vompi sisa hong muta uh hi. Lungdam mahmah napin a semna ding tem neilo-in agangpi uh kiangah tem kawm dingin va pai uh hi. Thangho leh Liando in a vom mat uh a gen ciangin a gang in, "Thangho leh Liando in vompi man uh ei. Khua zang aw, sa pua dingin hong kuan vo!" ci-in hong taangko hi.

Khua mite in a sa pua gai uh-a, Thangho leh Liando in a gilpi guak bek tang kha uhhi. Dahlua kisa'n kapkawmin lui-ah sil dingin apai uh leh a sunga ging helhel khat za-in Thangho in anau' kiangah: "Bawi aw kap kap ke'n; a sungah a ging helhel khat om hi" ci-in a nau a khem hi. Agil hong khei ciangun singkung tung pan vasa khat in, "Thangho Liando aw, khang deuhah, khang deuhah," ci-in a gen hi. Tua bangin khei dingin kithawi le-uh "Khang deuhah" ci'n na hilh zel hi. A khang lamah pai le-uh khua mite in phawk khalo ding cihna hih tuak hi. A tawpna ciangin a thum veina-ah hong khei uhleh, a gil sungah khipi tang vive a na om hi. A mauzong nuamlua kisa-in inn lamah hong ciah uh hi.

Thangho leh Liandote mi' lohung peuhin om a, a muh sunsun uh hawmin mimtang khat mu leh hawmin taang tang khat mu leh phel hawm uh hi. Lo na hong sep theih ciangun khaici ding nangawn neilo uh hi. A gang in aktaang huanin a omlaitakin sailungtang tawh taang hualkhawm uh a, tuateng khaici-in hong zang uh hi. Tagah mahmah uh hi mah taleh amau tegeel unau pen mi hoih, ahih manun mite'n zong a hehpih mahmah uh hi.

Nikhat, khua mui kuanin lo nawl sawlbawk lakah bang hiam khat ui in nana a; ava et uhleh piteek phinphian khat a na om hi. Hehpihhuaisa-in, nek ding nei kei mah taleh uh, "I meilum beek awi sak ni,"ci-in a inn-ah ciahpih uh hi. Anhuan ding neilo uh-a, a lokuankal-un api un anlim mahmah a na huansak thei zel hi. Nikhat, anhuan ding koipan a kaikhawm zel hiam cih theinuam uh ahih manin lo-kuan ding kineihin innkun-ah a en sim uh hi.

Tua bangin a etsim uleh api uh anhuan dingin kithawi-in pialkhangah a din kawmin a-nik a-puanteng lawhpi sung khatah a kisingin mimtang taangtang hong kiakhia latlat hi. Tua teng tawmin a huan hi. Annek hun ciangin Liando in a u' kiangah, "U aw, an ne ni," ci-in sam a, Thangho in, "Mi' su bal mi' taw bal duh ke'ng," ci-in a ne nuam kei hi. Tua ciangin a pi zong kisuangtakin, "Tute aw, tua bangin kei hong kih na hih uhleh, hih i sumtawng vai lakah ka tum mang ding a, na cinat na lainat ciangun, AKTAL SIAKKAWI-IN hih ka tum mangna mun nong bia zel ding uh hi," ci-in a sumtawngah meeinel hong kai-in tua lakah a pi uh a tum mang hi.

Api un a taisan khit ciangin hong hau mahmah ta uh a, Tong leh lamin hong om ta uh hi. Pitek kuama don noploh hong don hong kep ciangun amau ading gualzawhna leh hauhna nak hong suak hi. Damdamin a hauhna uh mun khempeuhah hong thanga, ni khat ni ciangin a nu un na za kha ahih manin, a tate' hauna en dingin Thanghote' innah hong hawh hi.

A neu tung vua kipan a don noploh a kep noploh a, a taisan hi mah taleh, Thangho leh Liando in hoihtakin na bawl veve uh hi. A gante uh a innkim, inn nuai vuah kual dimdem uh-a, zanin hong kisik ciangun inn kilingin a nu uh ihmu theilo hi. "KISISI KEI VE VUA... THANGHO LEH LIANDO' KAWSAH DING HI LEL VE UH TEH." peuh ci-in gante a hamsiat hi.

Thangho leh Liando in tua bang anu' hamsiatna a zak uh ciangin zing khua hong vaak ciangin "Nu, tuzan bang gen na hia?" ci a a dot uleh anu'n, "Thangho leh Liandote' sawmsial aw, hong sing ta luapluap uh teh, hong khim ta diai uh teh a ci hi veng aw," ci-in dawng hi. Pasal dang neisa ahih manin a om den ding lah hilo ahih manin inn-ah a ciah kik hong kul hi.

Apai ding zingsang ciangin inn kimvel a, akbu bah teng, aktui akhon uh a vial khat a tun ma-un, a nu' seeng hong dim hi. Unaute'n a nu' kiangah khuamual atun ciang nungheilo dingin a vaikhak uh hi. Ahi zongin anu uh kidek zolo-in khuamual a tun ciangin nunghei-a, atate innkiim a puanpi, puandum, puansan kiphokhia phengphang leh agan khakkhiatte uh taina leivui kitung biakbuakte hong galmuh ciangin atate hauhsakna thupi sa-in a lung alenggawp hi. Inn hong tun kik ciangin a taangzom vuah khakham vei-in pukin si kici hi.

Thangho leh Liando in zi hong nei ta uh-a, Thangho' zi min in Hantong hi a, Liando' zi min in Neihtong ahi hi. Ni khat ni ciangin a Pute uh veh dingin gungal lamah hong zinna uh a, a kuan lamun Guntui tamlo hi mah taleh, a ciah lam uh ciangin guntui na khangin a kan uhleh Thangho in a zi alet khahsuahin tui in Thangho' zi tai-in a si hi. Tua tawh kizui-in Thangho in hih bangin la na phuak hi.
Ka kuanlamin pal sialsial ta'ng, Ka ciah lamin Guitui a lian e,
Ka thaitong aw na pam lua hi e, Thai aw, tho aw ningzu lup aw,
I sum tual a lentual kawl va lam bang e,
a ci hi.
Mi' pawlkhat genna-ah Liando upa zaw hi, a cih uh hangin a taktakin Thangho mah upa zaw hi. Hih i pu Thanghote' Tangthu tulai mite' ading zong kisam mahmah ahih manin a theihhuai leh a ciaptehhuai Tangthu khat ahi hi. A ki-itna uh, a nunnemna uh, a mihehpihsiamna uh leh a kiniamkhiatnate un, i Kristian nuntakna tawh kisai-in etteh tak lua hi. Tu-in amau mel mu thei nawn kei mah lehang a kimuh thei lai khat om a, tua in gamlak a Thangho-Liando kici vasa zem hoih mahmah nih kithuah helhel den, asan zaw pen Thangho, a engpak pen Liando kici i muh theih ahi hi. A vasa bel khankha, baibek cia khawng khat ahi hi. A lamdanna bel vasa beng peuh in tuate man cih kithei ngeilo hi. Tua ahih manin a sih zawh nangawnun KAMPHA lai uh hi, ci-in kigen hi.

Thangho leh liandote unau pen Cimnuai-ah suak uh a, Geeltui-ah khangkhia uh hi. Geeltui pen gal in simin a kisiat ciangin Dimpi gam, Tuikawi-ah galtai uh hi. Thangho zi min Hantong hi-a ta neilo-in si hi. Thangho zong a sih ciangin Dimpi gamah kivui hi. Tuikawi tawh kigamlalo Cingkuallo a kikhawh lai-in Thangho' khi kimu hi. Dimlote haliamto khat in Taaklam mual-ah Thangho' teipi mu-a; Thangho' lutang zong Dimpi han keen sungah sengbeem cia pha-in tuni dong kem uh, cih thu zong om hi.

Liando in zong zi nei a; amin Neihtong ahi hi. Lailen khuate'n a sialte a deihgawh manun Liando that uh hi. Naulakte'n a lutang la-in Dimpi a Thangho' hanah koih uh-a, a gamh zong a taakdo (inka zawlpi) dongin tom uh hi.